Sukaldaritza liburua/Gozogintza/Bizkotxoak

Sukaldaritza Liburua

Teknikak · Osagaiak · Prestaketak · Gozogintza · Truko eta Aholkuak · Tresneria ·Glosarioa · Errezetak

Bizkotxoak harrotutako prestaketa gozoak dira.

Arrautza, azukrea eta irina dira osagai nagusiak, eta horiei koipe, legami edo bestelako lagungarri zaporetsuak gehitzea ere badago.

Prestaketa gehienetan, lehenik, arrautza eta azukrea irabiatu egiten dira, ongi harrotu eta oreari barruan aire gelaxkak sortuz.

Arrautzaren irabiatu hori Maria bainuan tenperatura beroan egingo bagenu, beti 70ºC-tik behera (hortik gora arrautza gogortu egingo da); hartara lortuko dugun harrotua iraunkorragoa izango da.

Labera sartu aurretik, irina eta bestelako osagai zaporetsuak kontu handiz gehitu beharko ditugu. Pauso hau ongi egin ezean, gelaxkak desegin eta orea jaitsi egingo da.

Orea labe beroan sartzean, gelaxkak gehiago handitzen dira eta beroarekin solido bihurtzen dira.

Gaur egun bizkotxo prestaketa askori legamia kimiko edo gasifikatzailea gehitzen zaie.

Legamia horrek elementu likidoekin nahastean erreakzio kimiko bat sortzen du, eta horren ondorioz, gasa sortzen da. Gas hori asko erabiltzen da bizkotxoak, eta gozogintzako bestelako prestaketak harrotzeko. Bizkotxoak prestatzeko, gehienetan, irin ahulak erabiltzen dira. Koipeak ere gehitzen zaizkie; hori egiten dugunean, ez da ore hain harrotua lortuko, baina, bai zaporetsuagoa eta pisutsuagoa. Kasu horietan legamia kimikoa ohikoagoa da. Komeni izaten da irinak nahastu aurretik, galbahean bahetzea. Irin zati baten ordez, arto irin findua erabil dezakegu.

Plum cakea.jpg

Bizkotxo oso arina

Bustitzeko bizkotxoak edo opil txikiak egiteko erabiltzen da bereziki. Irin zati baten ordez arto irin findua erabil dezakegu. Komeni izaten da irinak nahastu aurretik galbahetik behatzea. Bizkotxo arinaren aldean duen desberdintasuna da kasu honetan gorringoa eta zuringoa bananduta harrotzen direla.

Bizkotxo arina

Pastelak egiteko erabiltzen diren bizkotxo oinarriak dira. Ez dute koiperik, eta beraz, pisu gutxikoak izaten dira. Arrautza, azukrea eta irina dira osagai nagusiak. Bizkotxoetako moldeetan eta labeko plaketan egos dezakegu. Irin zati baten ordez, arto irin findua erabil dezakegu.

Bizkotxo pisutsuak

Bizkotxo mota honi koipe edo bestelako osagaiak, txokolatea, arbendolak, limoi eta laranja azal birrindua, intxaurrak, fruitu lehorrak,..... gehitzen zaizkie. Ez dira horrenbeste harrotzen; horregatik, legamia kimikoa ere gehitzen zaie.

Brownie bizkotxoa

Azkenburuetako prestaketa bezala asko erabiltzen da. Bere zapore eta urtsutasunagatik. Bere berezitasunak dira txokolate urtua, hautsa eta zatikatua, azukre beltza eta zuria eta intxaurrak. Bere horretan, tartaren baten oinarri gisa, izozkien gehigarri, erabil liteke.

Frantxipan bizkotxoa

Bikotxo honek mazapana ematen du; oso bizkotxo pisutsua dugu.

Genoar bizkotxoa

Bizkotxo honi gurin urtua gehitzen zaio, irina nahastu ondoren. Tartan oinarriak egiteko ere erabiltzen da.

Madalena bizkotxoa

Gosaritako gehien erabiltzen diren bizkotxoak. Bizkotxo pisutsuak baina orea meheagoa da.

Sobao bizkotxoa

Gurin ugariko pastela da; bizkotxo txiki karratuak dira. Rona izan dezake.

Sacher bizkotxoa

Txokolate estalkiarekin egiten den errezeta dugu.

Sableaux bizkotxoa: Gurin eta arbendol hautsarekin

Kasu honetan bizkotxoari gurina gehitzeaz gain, almendra hauts egina ere gehitzen zaio. Arbendola hauts bihurtu, irinarekin eta legamia kimikoarekin nahasturik, bahetu egiten da. Ondoren, arrautza eta azukre harrotuarekin nahasteko. Amaieran gurin urtua gehituko diogu.